တစ်နေ့တော့ အမတ်ကြီးနဲ့ဘုရင့်သားဟာ ဘုရင့်အနီးအနားမှာ ခစားလျှက်ရှိနေကြ၏။ထိုစဉ် မူးမတ်တစ်ယောက်သည် မင်းတာဝန်ကို မကျေမပြွန်ဖြစ်၏။ထို့ကြောင့် ဘုရင်မင်းမြတ် အမျက်ထွက်၍ ကြိမ်းမောင်း၏။ပြီးနောက် ထိုမူးမတ်အား " မင်းကအသုံးကိုမကျဘူး သုံးစားမရတဲ့ကောင်" ဟုအော်ဟစ်၍ အလုပ်ဖြုတ်ပစ်လိုက်၏။အမတ်ကြီးက " အရှင်မင်းကြီးထိုသူ့အား မဖြုတ်ပစ်ပါနှင့် အကျွန်ုပ်၏ လက်အောက်သို့ ရာထူးလွှဲပေးပါ" ဟုလျှောက်ထားသဖြင့် ဘုရင်ကြီးက အသုံးမကျတဲ့ကောင်ကို ယူပေတော့ဟုပေးလေ၏။
မင်းသားလဲ အမတ်ကြီးအား " အမတ်ကြီး ယခုလိုအသုံးမကျ သုံးစားမရတဲ့ကောင်အား အဘယ့်ကြောင့် ခေါ်ယူသနည်း" ဟုမေး၏။အမတ်ကြီးက " အရှင့်သား ထိုသူမှာ အသုံးမကျ၍မဟုတ် ဘုရင်မင်းမြတ်က အသုံးမချတတ်သောကြောင့်ဖြစ်သည်" ဟုဖြေ၍ နန်းတော်မှ ထွက်ခွာသွားလေသည်။
များမကြာမီ နန်းတွင်း၌ အရည်အချင်းရှိသော လုပ်ဆောင်မှုကောင်းသော အမတ်များစာရင်းထုတ်ပြန်ရာ အမတ်ကြီးရဲ့ ထိုအမတ်လဲပါဝင်သည်။ဘုရင်မင်းကလဲ ထိုအမတ်အားမှတ်မိလေသည်။သို့နှင့် အမတ်ကြီးအား " အမတ်ကြီး ဒီလိုသုံးစားမရတဲ့ကောင်ကို အမတ်ကြီးဘယ်လိုများ သင်ပေးလိုက်သနည်း" ဟုမေးလေ၏။
အမတ်ကြီးက " အရှင်မင်းမြတ် ထိုသူ့အား အကျွန်ုပ်ဘာမှ မသင်ပေး။ထိုသူကား စာရင်းအင်းအတွက်အချက် ကျွမ်းကျင်၏။ကုန်ပစ္စည်းများ၏ အကြောင်းကို တီးမိခေါက်မိရှိ၏။ အရှင်မင်းမြတ်က ယခင်ကထိုလူအား ကင်းစောင့်တာဝန်မှူး(နန်းမြို့ရိုးရှိ ကင်းစင်များ) ပေး၏။ထိုသူကား ညဘက်တွင်အမြင်အာရုံနည်းပါး၏။ လက်အောက်ငယ်သားများအုပ်ချုပ်ပုံလျော့ရဲ၏။
ကျွန်ုပ်ကား ထိုသူကို ဆိပ်ကမ်းဝန်အဖြစ် တာဝန်ပေး၏။ ဆိပ်ကမ်းတွင် ကုန်ပစ္စည်းအ၀င်အထွက် ပိုမိုတိကျလာ၏။ ကုန်ပစ္စည်းများကို တီးမိခေါက်မိရှိသောကြောင့် ပစ္စည်းကောင်းများနှင့် ပေါ်ချိန်၊ပေါချိန် ကိုလိုက်၍ ဈေးနှုန်းဖြစ်၏။ တရားမ၀င်အများအပြားတင်ပို့လာသောကုန်များကို စာရင်းအတိအကျနှင့်
စစ်ဆေး၍ မင်းဘဏ္ဍာအဖြစ်သိမ်းဆည်း သဖြင့်အကျိုးအမြတ်များများ ရရှိသောကြောင့်ဖြစ်ပေသည်"
မင်းကြီးလဲ ခေါင်းညိတ်၏။ဘာစကားမျှမပြောတော့။ ထို့ကြောင့် အမတ်ကြီးက မင်းသား ဘက်သို့လှည့်၍ " အရှင့်သား လောကမှာ အသုံးမ၀င်တဲ့အရာဆိုတာ တစ်ခုမှမရှိ၊အသုံးမချ တတ်သေး၍ ဖြစ်ပေသည်၊ သူ့နေရာနှင့်သူ အံဝင်ခွင်ကျ အသုံးချတတ်လျှင် များစွာအကျိုးဖြစ်ထွန်းစေရာ၏ " ဟု အားလုံးကြားအောင် ကျယ်ကျယ်လေးအော်ပြောလေသည်။ဘုရင်ကြီးကလဲ သူ့ကိုထောက်နေပြီဆိုတာ သိသဖြင့်
" အမတ်ကြီးလဲ အသက်ကြီးမှ အသံပိုကျယ်လာတယ် " ဟုပြောကာ ရှုက်ပြုံးပြုံးပြီး ပုလ္လင်ပေါ်မှ ဆင်းသွားလေသည်။မနက်ခင်းညီလာခံလဲ ပြီးဆုံးသွားလေသည်။
မောင်စိုင်း
No comments:
Post a Comment