Thursday, 15 November 2012

ယနေ့ခေတ် မီဒီယာစာမျက်နှာတွေပေါ်က အရက်ကြော်ငြာများနှင့် တိုင်းပြည် အနာဂတ် ပန်းပွင့်များ



 
ယနေ့ခေတ် မီဒီယာ လောကသည် လွတ်လပ် ပွင့်လင်းသော လမ်းကြောင်း ပေါ်သို့ ရောက်ရှိ နေချေပြီ။ ဂျာနယ်တိုက်ကြီး များလည်း ငွေအင်အား လုံလောက်စွာနှင့် လူအင်အား ပြည့်လျှံနေအောင် ပင် ရုန်းကန် နေကြသည်မှာ ဝမ်းသာ စရာပင်။ ပြည်သူအတွက် လိုအပ်သော စတုတ္ထ မဏ္ဍိုင်ဖြစ်သလို နိုင်ငံတော်၏ စတုတ္ထမဏ္ဍိုင်ဖြစ်ပေသည်။ ပြည်သူများထင်ထောင်ထင်မှားမဖြစ်စေဖို့ မီဒီယာများ၏တာဝန်သည် လည်း အရေးကြီး လှပေသည်။
လွတ်လပ်ပြီဆိုတိုင်း စည်းလွတ်ဘောင်လွတ် မဖြစ်စေဘဲလွဲနေ သည်များ တည့်မတ်စေဖို့ လိုသလိုတိကျမှန်ကန်မှုများနှင့် ယုံကြည်မှု ပေးနေသော မီဒီယာများ၏ စောင့်ထိန်းအပ်သည်များကိုလည်း တချို့ မှာအပေါ်ယံနှင့်အနှစ်သာရ မဝေခွဲနိုင်သယောင်ဆောင်နေတတ်၏။ တစ်ရက်က မုံရွာမြို့မှ ၈မိုင်ခန့် ထော်လာဂျီဖြင့်သွားရသော ရွာတစ်ရွာက အသိမိတ်ဆွေတစ်ဦးနှင့်စကားပြောဖြစ်ခဲ့သည်။ မြို့သို့ ရောက်တိုင်း ရွာစာကြည့်တိုက်အတွက် စာအုပ်၊ စာစောင်များကို မိတ်ဆွေများက လှူဒါန်းကြသောကြောင့် ရွာတွင်ဂျာနယ်အစုံနီးပါး ဖတ်ရှုရသည် ဟုဆိုသည်။
ထိုသို့ပြောပြီး မိတ်ဆွေများငြိမ်သက်၍ ငေးငိုင်သွားသည်ကိုသတိပြုမိသည်။ ဆက်ပြီး မိတ်ဆွေက သူ၏ သားအကြောင်းကို စိတ်မကောင်းစွာပြောပြနေသည်။ သူ၏သားက တောင်ဘက် ၃ရွာအကျော်က
အထက်တန်းကျောင်းပြီးသည်အထိ ကျောင်းနေခဲ့ရသူတစ်ဦးဖြစ်ကြောင်း၊ ကျေးရွာစာကြည့်တိုက်ထူ ထောင်စဉ်ကတည်းက အားကျိုးမာန်တက်ပါဝင်လုပ်ခဲ့သလိုယခုလည်း စာကြည့်တိုက်ကို တာဝန်ယူလျက်ရှိကြောင်းပြောပြသည်။
နောက်ပိုင်းတွင် မြို့ကပါလာသောဂျာနယ်များထဲမှ အရက် ကြော်ငြာများ၏ကံစမ်းမဲပေါက်သူများအပေါ်အားကျသည့် လွဲမှား သောအတွေးဝင်ကာ ယခုအချိန်တွင် ညနေစောင်းပါက သား၏ ပါးစပ်မှ အရက်အနံ့လေးများပါလာတတ်ကြောင်းသူ၏သူငယ်ချင်းများ ပြောပြချက်အရ မော်တော်ကားကံစမ်းမဲပေါက်ချင်၍ ရွာထိပ်ကကုန်စုံ ဆိုင်မှ ပုလင်းများဝယ်ပြီး ကံစမ်းနေကြောင်းသိရသည်ဟုဆိုသည်။
အမှန်တကယ်က သူ၏သားငယ်သည် ဆေးလိပ်၊ အရက်လုံးဝ သောက်သုံးတတ်သူမဟုတ်၍ စိတ်ချခဲ့သောမိမိ၏အမှားပင်ဖြစ် ကြောင်းပြောရင်း ပြောနေသည့်မိတ်ဆွေ၏သောကကိုကြည့်ရင်း စိတ် မကောင်းဖြစ်မိသည်။ ဤသို့ဖြစ်နေခြင်းမှာ မည်သူ့တွင်တာဝန်ရှိသည် ဟု ဘယ်သူ့ကိုအပြစ်ပုံပြောရမည်မသိတော့ချေ။
ဂျာနယ်စာမျက်နှာများတွင် အရက်၊ ဘီယာ၊ စီးကရက်ကြော် ငြာများကို တရားဝင်ခွင့်ပြုထားသည်လား၊ တရားမဝင်ခွင့်ပြုထား သည်လားမပြောတတ်ပေ။ စာမျက်နှာများပေါ်တွင် မြန်မာပြည်မှ ဘီယာတံဆိပ်များကလည်း အင်္ကျီထုတ်သကဲ့သို့ ဥပဒေလက်တစ် လုံးခြားဘီယာရောင်းအားမြင့်စေရန်ကြော်ငြာသည်။
အရက်ကုမ္ပဏီ များကလည်း သောက်ရေသန့်လိုလို PH7 ဆိုပြီး တံဆိပ်သေးသေး လေးထည့်သွင်းကာ ဥပဒေလက်တစ်လုံးခြားကြော်ငြာနေခြင်းများ တွေ့ရသည်။ ဤ၍ဤမျှ အရက်ကုမ္ပကြီးများက နိုင်ငံတော်ကို မည်သို့ပြောင်းလဲစေချင်သနည်းဟုမေးရတော့မလိုပင်။ တစ်နိုင်ငံလုံး အား ငယ်စဉ်ကတည်းက "အရက်မသောက်မနေရ"ဟု အရက် ဘီယာကုမ္ပဏီများက သူတို့ပိုင်နိုင်လျှင် ကြေညာချက်ထုတ်ဦးမည် လား မပြောတတ်တော့။ သည်လိုနှင့် မိမိတို့နိုင်ငံတွင် သင်္ကြန်သည် လည်း အရက်၊ ဘီယာပွဲတော်ဖြစ်လို့ဖြစ်၊ ဗုဒ္ဓဘာသာတို့၏ လပြည့် ရက်များ၏အရောင်းကောင်းဆုံးကုန်ပစ္စည်းမှာလည်း အရက်၊ ဘီယာ များဖြစ်လာခဲ့သည်။
ဤသို့သောကိစ္စများကိုနိုင်ငံတော်မှ မည်သို့ဖြေရှင်းပေးနိုင်မည် နည်း။စဉ်းစားစရာကောင်းလှပေသည်။ယနေ့ခေတ်တိုးတက်နေသော မီဒီယာကြီးများ၏ စာမျက်နှာ မျက်နှာပြည့်ရောင်စုံဖြင့်PH7 ဆို သည့်ကြော်ငြာများသည် အရက်ကြော်ငြာများဖြစ်သကဲ့သို့ ထိုကိစ္စ အတွက်နှာစေးနေသူများလည်းများစွာရှိနေသည်။ နောက်ထပ်ကိစ္စတစ်ခုက ဘောလုံးလောင်းကစားဝဲဂယက်ဖြစ် ၏။
ဘောလုံးလောင်းကစားကို အဓိကမဏ္ဍိုင်အဖြစ်ရပ်တည်နေကြ သော စာစောင်အချို့တွင် ကြည့်မြင်နိုင်သည်။ ဘောလုံးလောင်း ကစားပေါက်ကြေးများကို စာမျက်နှာများပေါ်တွင် ဥပဒေလက်တစ် လုံးခြားဖော်ပြနေကြသည်။ တစ်ချို့စာစောင်များတွင် ဘောလုံးပွဲစဉ် အတွဲလိုက်လောင်းကြေးထည့်ရသော 'မောင်း'အတွက်ထည့်ထား သည်ကိုလည်းပါလာနေသည်။ အရက်သေစာ၊ လောင်းကစားနှင့် စည်ပင်နေသောနိုင်ငံသည် မည်သို့ပင်ပြုပြင်စေကာမူ အထနှေး၍လေးလံစေတတ်သည်ကိုသတိ ပြုချင်စေချင်သည်။
သည်ကြားထဲ အခြေခံလူတန်းစားဝန်းကျင်ထဲမှ နှစ်လုံး၊ သုံးလုံးဆိုသော လောင်းကစားများလည်း ပပျောက်ဖို့ဆို သည်မှာမလွယ်သေး။ ရှိနေဆဲ၊ ရှိဆဲပင်။နှစ်လုံး၊သုံးလုံးခန့်မှန်းတွက် ချက်နိုင်သည့် “ချိုင်း”ဆိုသောစာရွက်များမှာ ဘောလုံးအားကစား ဂျာနယ်များကဲ့သို့ သွယ်ဝိုက်၍ထွက်ရှိလာဦးမည်လားမပြောတတ်။ မူးယစ်စေတတ်သောဆေးဝါးများမလိမ့်တစ်ပတ်ဖြင့်ကြေညာလာကြ မည်ကိုလည်းအနာဂတ်အတွက်စိုးရိမ်နေရပြန်သည်။
တိုင်းပြည်၏ အနာဂတ် ပန်းများ လှပစေဖို့ မီဒီယာများတွင် အတိုင်း အတာတစ်ခုထိတာဝန်ရှိပေသည်။ ဤကဲ့သို့ မိမိ၏စာစောင်ပေါ်တွင် သိသိကြီးနှင့် မလိမ့် တစ်ပတ်ဖြင့် ကြော်ငြာပေးသွားမည်လား။ မိမိတို့ ၏ မီဒီယာစာမျက်နှာပေါ်မှာ ပေါ်ပေါ်တင်တင်လှည့်စားမှုများ ကင်း ရှင်း၍ အများအကျိုးပြုစေဖို့ တိုက်တွန်း လိုက်ရပေသည်။
 
အောင်သက်ခိုင် ဘလောဂ် မှ သိသမျှ ။
 

No comments:

Post a Comment