Monday 25 November 2013

မေတ္တာတရား ထားကြည့်ကြပါ



မေတ္တာဆုိုတာ အကျိုးလုိုလားခြင်းပဲ ဖြစ်ပါတယ်။ တစ်ဦးနဲ့တစ်ဦး ကောင်းတဲ့အကျိုးလေးတွေ ဖြစ်စေချင်တာ၊ ကောင်းတာလေးတွေ သိစေချင်တာ၊ ရစေချင်တာ၊ မကောင်းတာတွေကနေ ရှောင်ကြဉ်စေချင်တာ စတာတွေဟာ မေတ္တာရဲ့ သဘောပဲ ဖြစ်ပါတယ်။ သတ္တဝါတုိုင်းဟာ ဒီလုို အကျိုးလုိုလားတဲ့ မေတ္တာလေးတွေ ထားကြည့်ကြဖုို့ လုိုပါတယ်။ ဒါဟာ ငွေကုန်ကြေးကျ များသွားတဲ့ အလုပ်မဟုတ်ပါဘူး။ စိတ်ကလေးနဲ့ပဲ ဖြစ်ဖြစ် သူ့အကျိုးကုို လုိုလားကြည့်ကြဖုို့ လုိုပါတယ်။ ကုိုယ်နဲ့ပတ်သက်တဲ့သူတွေ၊ ကုိုယ့်ပတ်ဝန်းကျင်မှာ ရှိတဲ့သူတွေ၊ ကုိုယ့်အသုိုင်းအဝုိုင်း၊ ကုိုယ့်နုိုင်ငံသား၊ ကုိုယ့်တုိုင်းရင်းသားများရဲ့ အကျိုးတစ်မျိုးမျိုးကုို ဖြစ်စေချင်တာဟာ ဒါလည်း မေတ္တာရဲ့ သဘောပဲ ဖြစ်ပါတယ်။

မေတ္တာတရားဟာ သတ္တဝါတုိုင်းအတွက် အရေးတကြီး ရှိထားသင့်တဲ့ တရားပဲ ဖြစ်ပါတယ်။ ဘာဖြစ်လုို့လဲဆုိုရင် တစ်ဦးနဲ့တစ်ဦး အကျိုးလုိုလားတဲ့ ဒီမေတ္တာတရား မထားနုိုင်ဘူးဆုိုရင် အပြစ်တွေပဲ ဖြစ်စေချင်ပြီး အဲဒီနောက်ကွယ်မှာ အကျိုးသက်ရောက်မှုတွေဟာလည်း မကောင်းတာတွေပဲ ဖြစ်ပေါ်စေတတ်လုို့ပဲ ဖြစ်ပါတယ်။ သတ္တဝါတွေဟာ တစ်ဦးနဲ့တစ်ဦး အကျိုးလုိုလားနေကြမယ်ဆုိုရင် တစ်ယောက်အပေါ်တစ်ယောက် ဒုက္ခရောက်အောင်လည်း လုပ်ဖြစ်ကြမှာ မဟုတ်ပါဘူး။ အဲဒီလုို အားလုံးက ကုိုယ်ဆီမေတ္တာလေးတွေ ထားပေးနုိုင်ကြမယ်ဆုိုရင် လောကမှာ အကျိုးမဲ့ဆုိုတာ ရှိမှာတောင် မဟုတ်ပါဘူး။

တစ်စုံတစ်ယောက်ရဲ့ အကျိုးကုို လုိုလားတဲ့ စိတ်ရှိနေသူဟာ မေတ္တာတရား ကိန်းနေတဲ့သူဖြစ်တဲ့အတွက် သူ့သန္တာန်မှာ ပူလောင်တဲ့ ဒေါသတရားလည်း လျော့နည်းနေတော့တာ ဖြစ်ပါတယ်။ မေတ္တာဟာ ဆန့်ကျင်ဘက် ဒေါသကုိုလည်း ပယ်ဖျောက်စေတတ်တာ ဖြစ်တဲ့အတွက် တစ်စုံတစ်ယောက်ရဲ့ အကျိုးကုို

လုိုလားနေသူဟာ ဒေါသကုို အခြေခံပြီး ဖြစ်ပေါ်လေ့ရှိတတ်တဲ့ မကောင်းကြံတာ၊ မကောင်းပြောတာ၊ မကောင်းလုပ်တာတွေလည်း မလုပ်ဖြစ်တော့ပါဘူး။ သူများမကောင်းကြံတာ၊ သူများမကောင်းကြောင်း ပြောဆုို၊ လုပ်ကုိုင်ကြတယ်ဆုိုတာ တကယ်တော့ မေတ္တာတရား ခေါင်းပါးလုို့ပဲ ဖြစ်ပါတယ်။ မေတ္တာနည်းရင် ဒေါသအားကြီးတတ်ပြီး ဒေါသများတဲ့သူဟာ အကျိုးမဲ့တွေကုိုပဲ ပြုလုပ်စေတတ်တာ ဖြစ်တဲ့အတွက် သတ္တဝါတုိုင်းဟာ မေတ္တာတရားလေးတွေ ကိန်းနေနုိုင်အောင် ကြိုးစားကြရမှာ ဖြစ်ပါတယ်။

မေတ္တာတရားဟာ ကိုယ့်အကျိုးကုို မျှော်လင့်ခြင်း မဟုတ်ဘဲ သူ့အကျိုးကုို လုိုလားခြင်း ဖြစ်တဲ့အတွက် မေတ္တာထားတဲ့ သူတွေဟာ အပူအပင် ကင်းနုိုင်ကြပါတယ်။ သတ္တဝါတွေ ပင်ပန်းကြတယ်ဆုိုတာ အလုပ်လုပ်တဲ့ အခါတုိုင်း အကျိုးကုို မျှော်လင့်နေမိတဲ့အတွက် အဲဒီမျှော်လင့်တဲ့အတုိုင်း ဖြစ်မလာတဲ့အခါ ပင်ပန်းကြခြင်း ဖြစ်ပါတယ်။ မေတ္တာစိတ်ဟာ တစ်ဦးတစ်ယောက်ဆီက အကျိုးရလာဘ်ကုို မျှော်လင့်ခြင်း မဟုတ်ဘဲ တစ်ဦးတစ်ယောက်ရဲ့ အကျိုးကိုသာ ဖြစ်စေလုိုခြင်းပဲ ဖြစ်တဲ့အတွက် အများအကျိုးရှိလေ မေတ္တာသမားရဲ့ စိတ်မှာဝမ်းသာလေပဲ ဖြစ်ပါတယ်။

ဆုိုတော့ကား ဘဝမှာ သတ္တဝါတွေဟာ တစ်ဦးအပေါ်တစ်ဦး အကျိုးလုိုလားတဲ့ စိတ်လေးတွေနဲ့ ပြောဆုိုဆက်ဆံ ပြုမူကြမယ်ဆုိုရင် အလုိုလုိုနေရင်း မေတ္တာ တရားလေးတွေ ဖြစ်ပေါ်နေကာ၊ မေတ္တာရဲ့ အစွမ်းကြောင့်ပဲ တစ်ဦးနဲ့တစ်ဦး အကျိုးပြုနေမိတာ ဖြစ်တဲ့အတွက် လူတုိုင်းလူတုိုင်းဟာ တစ်ကမ္ဘာလုံးကုို လွှမ်းခြုံပြီး မေတ္တာ မထားနုိုင်တာတောင်မှ ကုိုယ့်ပတ်ဝန်းကျင်၊ ကုိုယ့်အသုိုင်းအဝုိုင်းမှာတော့ တစ်ဦးနဲ့တစ်ဦး အကျိုးလုိုလားတဲ့ စိတ်လေးတွေနဲ့ ကြံစည်၊ ပြောဆုို၊ ပြုမူ ဆက်ဆံကာ မေတ္တာတရား ထားနုိုင်အောင် ကြိုးစားသင့်ကြပါတယ်။

စာရေးသူ = မနာပဒါယီ အရှင်ဝိစိတ္တ(ဒိုက်ဦး)
စုစည်းထားမှု = တွေးမိသမျှ .....TTK မှ သိသမျှ ။


No comments:

Post a Comment